Jakob Möller hæstaréttarlögmaður var svo vinsamlegur að benda mér á að veðrið sem ég skrifaði um í pistli í gærkvöldi hefði sennilega verið 16. febrúar 1970. Þá, eins og ég lýsti, var óveður með mikilli snjó um morguninn, en upp úr tíu lægði, snjókomunni slotaði, og börn nutu skólafrís og fóru út að leika sér í fannferginu.

Jakob segir að þennan dag hafi verið 50 ára afmæli Hæstaréttar, það hafi verið kolófært í bænum, og snjóbíll hafi verið sendur til að sækja saksóknara ríkisins, Valdimar Stefánsson, sem bjó á horni Ægissíðu og Hofsvallagötu.

Hér má sjá hvernig Morgunblaðið sagði frá veðrinu daginn eftir.

Og mig misminnir greinilega ekki varðandi hvað þetta var mikill sæludagur fyrir börnin.

Í dag var ekki gefið sérstaklega frí í skólum vegna veðurs. Nú er hins vegar komin snjókoma og skafrenningur og færðin verulega tekin að spillast. Það var ekki vandamál að koma krökkunum í skólann, en spurning hvernig verður að koma þeim heim aftur seinna í dag. Skólarnir eru náttúrlega að nokkru leyti geymslustaðir líka – ef börnin eru heima er hætt við að „stöðvist hjól atvinnulífsins“. Og það má náttúrlega ekki.