Hér á heimilinu hafa verið miklar vangaveltur nú seinnipartinn um hvort skólahaldi verði frestað á morgun vegna veðurs. Svona hjóðar spáin.

Vax­andi aust­an átt í nótt. Snemma í fyrra­málið má bú­ast við slæmu skyggni vegna skafrenn­ings víða suðvest­an­lands, þar með talið á höfuðborg­ar­svæðinu og á Reykja­nes­braut. Hvess­ir enn þegar líður á morg­un­inn og fer að snjóa og bú­ast má við mik­illi snjó­komu fram eft­ir degi. Síðdeg­is milli kl 15. og 18. snýst vind­ur í hæg­ari vest­an átt með élja­gangi, fyrst á Reykja­nesi. Versn­andi veðri er spáð aust­an­lands seint.

Það verður kannski hægt að koma börnunum í skólann, en miðað við þetta gæti verið erfitt að koma þeim heim aftur. Þyrfti jafnvel að kalla út hjálparsveitir til þess.

Það blundar reyndar í mér minning um einhverja bestu daga bernskunnar – dagana þegar skólum var aflýst vegna veðurs. Þetta gerðist örsjaldan en þessir dagar ljóma í minningunni.

Ég man til dæmis einn dag, þá var ég held ég enn í Öldugötuskólanum gamla, það kyngdi niður fönn um nóttina og morguninn. Þegar leið að hádegi lægði og birti til. Þá þustu börnin út. Það var svo mikill snjór að hægt var að grafa löng göng gegnum fannfergið sem hafði safnast í kringum Landakotstúnið.

Ein eins og ég segi, það er óvíst hvort verður skóli á morgun. En það er allavega eitt sem má ekki gera í svo vondu veðri og erfiðri færð: Funda í fjárlaganefnd. Menn geta orðið svo úrillir.