Ari Trausti Guðmundsson skrifar sérlega tímabæra grein á vefinn Umhverfisfréttir – og er efni hennar rakið hér á Eyjunni.

Í greininni reynir Ari Trausti að slá aðeins á órana sem hafa einkennt umræðuna um norðurslóðir. Þar ræður því miður græðgin förinni. Ari Trausti varar við „of hástemmdum orðum um þýðingu norðursins“ og „ofleik einstaklinga“.

Forseti Íslands er einn af þeim sem hafa haft uppi hvað hástemmdastar lýsingar á norðrinu, framtíð þess og þýðingu fyrir heiminn. Semsagt því sem Ari geldur varhug við.

Forsetinn situr í stjórn félagsskapar sem nefnist Arctic Circle. Hann heldur reglulega ráðstefnur á Íslandi. Þar sitja með honum Artur Chillingarov, sérstakur vinur Pútíns, mikill áhugamaður um rússneska útþenslu. Hans hefur áður verið getið á þessum vettvangi og einnig stjórnarmannsins Lisu Murkowski, öldungadeildarþingmanns frá Alaska.

Lisa Murkowski er orðin forseti orkunefndar Öldungadeildarinnar og nú er hennar sérstaklega getið vegna þess að hún ætli að brjóta á bak aftur umhverfisstefnu Obamas forseta með því að þvinga í gegn lagningu svokallaðrar Keystone XL olíuleiðslu.

En Murkowski er ekki sérlega trúuð á að loftslagsbreytingar af mannavöldum séu yfirleitt vandamál – þótt hún sé ein aðalsprautan á bak við Arctic Circle sem einmitt fjallar um heimshluta þar sem áhrif þeirra eru mest áberandi.