Eins og segir á ensku: The plot thickens.

Gísli Freyr Valdórsson, aðstoðarmaður Hönnu Birnu Kristjánsdóttur, er ákærður fyrir að leka trúnaðargögnum úr innanríkisráðuneytinu.

Áður hafa birst upplýsingar í fjölmiðlum sem benda eindregið til þess að hann sé sekur.

En Gísli segist vera saklaus og er sannfærður um að hann verði sýknaður.

Sigurjón M. Egilsson rifjar upp þau orð Hönnu Birnu að hafi einhver úr ráðuneytinu sent gagnið frá sér, þá hafi hinn sami algjörlega brotið trúnað gegn henni.

Hanna Birna segir í yfirlýsingu sinni frá því í dag:

„Þrátt fyrir að Gísli Freyr hafi ávallt haldið því fram gagnvart mér að hann sé með öllu saklaus af málinu og geri það enn, hef ég tekið þá ákvörðun að leysa hann nú þegar frá störfum á meðan málið er til meðferðar fyrir dómsstólum.“

Gísli er semsagt leystur frá störfum – hafandi væntanlega margoft sagt við ráðherrann að hann sé saklaus.

En Hanna Birna er í raun bara hluti af ráðherra, því hún hefur afsalað sér í bili þeim málefnum sem hafa með dómsmál og ákæruvald að gera, líkt og segir í yfirlýsingu hennar.

Fyrr í dag höfðu bæði Hanna Birna og Sigmundur Davíð Gunnlaugsson svarað fyrirspurnum frá umboðsmanni Alþingis. Svör Hönnu Birnu skýrðu ekki margt, en Sigmundur spurði umboðsmann á móti hvort hann hefði siðareglur.

Takið eftir að allt þetta gerist rétt fyrir helgarfrí, síðdegis á föstudegi. Samkvæmt almannatengslafræðum er það góður tími til að flytja vondar fréttir.