Skoðanakönnunin um borgarpólitíkina sem birtist í Fréttablaðinu í gær leiðir ýmislegt í ljós. Þar var bæði spurt um fylgi flokka í borginni og fylgi oddvitanna sem leiða lista flokkanna. Þar er að finna dálítið misræmi.

Heil 56,5 prósent segjast vilja að Dagur B. Eggertsson verði borgarstjóri eftir kosningarnar. Samt er fylgi flokks hans, Samfylkingarinnar, ekki nema 26,5 prósent. Stuðningurinn við Dag nær semsagt langt út fyrir raðir Samfylkingarinnar.

Má kannski álykta af því að flokkurinn dragi Dag niður – að hann sé dragbítur? Það verður að segjast eins og er að Samfylkingin er ekki sérlega sterkt „vörumerki“ um þessar mundir.

Þetta horfir öfugt við þegar Sjálfstæðisflokkurinn á í hlut. Einungis 16 prósent segjast vilja Halldór Halldórsson sem borgarstjóra. En stuðningurinn við flokkinn er 27 prósent.

Af því virðist mega ráða að fólk sé að kjósa Sjálfstæðisflokkinn þrátt fyrir Halldór – að hann sé fremur dragbítur á framboðið en hitt. Þess er auðvitað að gæta í þessu sambandi að hér er Sjálfstæðisflokkurinn í algjöru lágmarksfylgi í borginni – þetta er heilum 7 prósentustigum minna en í síðustu kosningum. Það má kannski álykta sem svo að Sjálfstæðisflokkurinn sé kominn niður í tálgað fastafylgi sitt í borginni.