Það eru ýmsar vendingar í lekamálinu – sem um tíma í vikunni var lækmálið.

Nú stefnir Þórey Vilhjálmsdóttir, aðstoðarmaður Hönnu Birnu Kristjánsdóttur, blaðamönnum DV fyrir að birta frétt – það var reyndar stór uppsláttur – um að hún væri „starfsmaður B“, semsagt að hún hafi verið hin grunaða í málinu. Það kom svo á daginn að þetta var Gísli Freyr Valdórsson, annar aðstoðarmaður.

Þessi frétt reyndist röng, birting hennar var alvarlegt glappaskot. Blaðið baðst afsökunar, en í raun er mjög skiljanlegt að Þórey skuli fara í mál. Reynir Traustason, þáverandi ritstjóri kemur með þá skýringu á Facebook, að þegar lesið var í dómsúrskurð hafi Þóreyju verið ruglað við hinn aðstoðarmanninn. En það verður samt að teljast fjarska léleg blaðamennska:

Reynir sendir Þóreyju tóninn og leggur sig ekki í líma um að vera kurteis:

Þessi kona er klækjakvendi. Enn einu sinnni gefur hún út að hún hyggist stefna verðlaunablaðamönnunum, Og enn einu sinni ropa allir fjölmiðlar þessu upp. Hún gerði betur í því að stefna og leyfa fólki síðan að leggja mat á málið. Það merkilega er að húnn stefnir fyrir að henni var ruglað saman við hinn aðstoðarmanninn þegar lesið var í dómsúrskurð. Í huga Þóreyjar skiptir engu þótt menn hafi leiðrétt og beðist afsökunar.

Það verður áhugavert að sjá hvernig dómurinn tekur á þessu – og hver verður málsvörn blaðamannanna. Það gæti varpað ljósi á allt málið.

Í fréttatilkynningunni sem Þórey sendi frá sér er athyglisverð klausa, þar segir:

Einnig er því ranglega haldið fram að ég hafi átt í samskiptum við ákveðna fjölmiðla og að ég hafi leitað að áðurnefndum trúnaðarupplýsingum í tölvu minni. Allt eru þetta grófar og tilhæfulausar aðdróttanir sem fela í sér að ég hafi gerst sek um refsivert athæfi og alvarlegt brot í starfi.

Það er semsagt skilningur aðstoðarmanns Hönnu Birnu að það sem gerðist í ráðuneytinu hafi verið alvarlegt og refsivert.