Í Kiljunni í kvöld kynnumst við nokkrum rithöfundum sem voru gestir á Bókmenntahátíð í Reykjavík.

Þar má nefna Kiran Desai frá Indlandi Ewu Lipsku frá Póllandi, Rachel Joyce frá Englandi, Nuka K. Godtfredsen frá Grænlandi, Hermann Koch frá Hollandi og Georgi Gospodinov frá Búlgaríu.

Joyce og Koch hafa verið mjög vinsælir höfundar á Íslandi, en nú er nýskeð búið að þýða bækur eftir Desai og Gospodinov.

Við fáum í þáttinn Jón Karl Helgason sem er nýbúinn að senda frá sér bók sem hann kallar Ódáinsakur, Helgifesta þjóðardýrlinga. Þar fjallar hann um hvernig þjóðardýrlingar á Íslandi hafa orðið til og dafnar. Við heyrum um styttur Jónasar Hallgrímssonar og Jóns Sigurðssonar, en líka um einkennilegan flutning á beinum Jóns Arasonar.

Við kynnum til leiks tvo nýja gagnrýnendur þáttarins, þá Sigurð G. Tómasson og Þorgeir Tryggvason. Þeir fjalla um tvær bækur, Í spor Jóns lærða sem er ritgerðasafn um þann merka mann og Gengið með fiskum eftir Pálma Gunnarsson.

Bragi spjallar um Jóhann Sigurjónsson.

Hinar mögnuðu teiknimyndasögur Nuka K. Godtfredsen úr forsögu Grænlands verða til umfjöllunar í Kiljunni.