Sú athygisverða staða er komin upp í borginni að Besti flokkurinn ætlar að bjóða aftur fram. Hann ætlar semsagt að verða alvöru stjórnmálaflokkur – við erum með systurflokk hans á Alþingi.

Þetta tvíhöfða stjórnmálaafl skipar sér í fylkingu frjálslyndra flokka – þar verður Besti flokkurinn í næstu kosningum því varla verður framboðið núna á forsendum gríns.

Besti flokkurinn ætti að hafa möguleika á að vera áfram stærsta stjórnmálaaflið í borginni. Jón Gnarr er ágætlega vinsæll borgarstjóri – og það verður ekki séð að Besta hafi tekist verr til við stjórnun borgarinnar en flokkum sem á undan komu. Innan hópsins virðist ríkja góð samstaða.

Það skiptir líka máli í þessu hvað aðrir flokkar eru veiklaðir.

Framsókn á ekki sæti í borgarstjórninni í Reykjavík, VG hafa þar einn fulltrúa og Samfylkingin hefur eiginlega runnið saman við Besta flokkinn.

Sjálfstæðisflokkurinn er mjög veikur miðað við það sem áður var. Það er liðin tíð að hann geti náð hreinum meirihluta í borginni – það gerðist síðast 1990! Mjög ólík viðhorf eru uppi meðan Sjálfstæðismanna í borginni. Borgarfulltrúarnir Gísli Marteinn Baldursson, Þorbjörg Helga Vigfúsdóttir og Áslaug Friðriksdóttir hafa farið þá leið að starfa málefnalega með meirihlutanum í stað þess að eyða tímanum í eilífa stjórnaandstöðupólítík.

Þetta mælist heldur illa fyrir sums staðar í flokknum – til dæmis á Morgunblaðinu. Þau þrjú koma fyrir eins og fólk sem einfaldlega vill borginni vel, starfar að heill hennar, það gæti verið erfitt fyrir þau að taka allt í einu upp einhvern bardagaham.

Núverandi oddviti borgarstjórnarflokksins er Júlíus Vífill Ingvarsson, en hann er langt í frá óumdeildur. Uppi eru raddir innan flokksins að kalla þurfi til einhvern sem getur látið Gnarr finna til tevatnsins, þar hefur til dæmis verið nefndur Guðlaugur Þór Þórðarson.

Það er því ekki ólíklegt að við gætum fengið fjögur ár í viðbót af Besta flokknum, þá líklega með Samfylkingu. Og ef vantar upp á má kannski bjóða Vinstri grænum með.

Jón Gnarr: Borgarstjóri í fjögur ár í viðbót?