Kiljan í kvöld verður með nokkuð öðru sniði en venjulega. Hún snýst aðallega um tónlist.

Þátturinn er styttri en endranær, vegna Íslensku tónlistarverðlaunanna sem verða í beinni útsendingu á RÚV í kvöld.

Við verðum líka á músíkölskum nótum, fjöllum um útgáfu bóka sem innihalda nótur.

Þar er um að ræða glæsilegt safn með lögum Sigfúsar Halldórssonar, þess ástsæla tónskálds, og Söngvasafn, en það er ný bók sem inniheldur meira en 200 íslensk sönglög og er ætluð til notkunar meðal almennings og í skólum. Það voru Ingólfur Guðbrandsson, Þorgerður Ingólfsdóttir og Snorri Sigfús Birgisson sem söfnuðu efninu í bókina.

Það er sérlega ánægjulegt að syngja og spila upp úr báðum bókunum. Við fáum til liðs við okkur Svavar Knút og sönghóp sem nefnist Ljóti kór til að syngja lög eftir Sigfús Halldórsson, Atla Heimi Sveinsson og Magnús Blöndal Jóhannsson.

Gagnrýnendur þáttarins fjalla um tvær bækur: Hina veglegu útgáfu með textum Megasar frá 1966-2011 og skáldsöguna Ástir eftir Javíer Marías.

En Bragi segir meðal annars frá bóksalanum Ársæli Árnasyni, verðmætum útgáfum á Halldóri Laxness, og ferð sinni til Sovétríkjanna.