Grétar Þór Eyþórsson stjórnmálafræðingur tók saman myndina hér að neðan og setti á Facebook – ég leyfði mér að taka hana þaðan. Endurkjör Ólafs Ragnars virðist næsta öruggt og svo hefur verið nokkra hríð.

Eftir kosningarnar munu menn leita skýringa á því hvers vegna Ólafur Ragnar nær að höfða svona til þjóðarinnar. Við lestur Facebook mætti halda að helmingur þjóðarinnar sé barasta svona heimskur – þar er mikið um upphrópanir þess efnis – það er skýring sem er þægilegt að grípa í þegar leikar hitna.

En virðingin fyrir skoðunum annarra er náttúrlega í nokkru lágmarki á Íslandi um þessar mundir.

Lífið mun halda áfram sinn vanagang þótt Ólafur Ragnar sigri. Í haust er ráðgerð þjóðaratkvæðagreiðsla um stjórnarskrártillögur Stjórnlagaráðs – þar eru vissar breytingar á hlutverki forsetans og einkum þó getu kjósenda til að krefjast þess að mál séu sett í almenna atvkæðagreiðslu.

Alþingi þarf líka að samþykkja þessar tillögur, ekki einu sinni heldur líka eftir næstu kosningar. Þá verður væntanlega mynduð ný ríkisstjórn á Íslandi og margir hafa gert því skóna að þar ætli Ólafur Ragnar sér hlut. En verði kosningaúrslitin sæmilega skýr, þ.e. ef ekki kemur til sérstakar stjórnarkreppu, er ólíklegt að það gerist.

Þannig að líklega verður ekki neinna sérstakra stórtíðinda að vænta frá Bessastöðum næstu misserin.