Tvær skoðanakannanir vekja athygli um þessi mánaðarmót.

Ríkisstjórnin fær hrós í erlendum blöðum fyrir endurreisn íslensks efnahagskerfis, það er sagt að heimurinn fylgist með því hvernig þjóð skiptir úr bóluhagkerfi yfir í raunhagkerfi þar sem fiskur og ferðamennska eru í fyrirrúmi.

En á sama tíma birtist könnun þar sem kemur í ljós að ríkisstjórn á Íslandi hefur hérumbil aldrei verið óvinsælli. Aðeins stjórn Geirs Haarde náði jafnmiklum óvinsældum á síðustu metrunum.

Það er líklegt að fari um ríkisstjórnarflokkana þegar þeir sjá þetta – og eins þegar þeir skoða fylgistölur Sjálfstæðisflokksins.

Nú er ár til kosninga og í raun eru líkur á að þetta boði pólitískan firnavetur þar sem stjórnarflokkarnir reyna að ná aftur vígstöðu sinni. Innan Samfylkingarinnar er mikil hreyfing í þá átt að skipta um formann – innan VG finnst mönnum að þeir geti ekki lengur haft óvinsæla aðildarumsókn hangandi yfir sér.

Svo kemur önnur könnun sem segir að Íslendingar séu ekki lengur í hópi hamingjusömustu þjóða í heimi. Þar áttum við löngum vísan stað í efstu sætum.

En nú eru meira að segja Finnar – sem sagt er að hafi eðlislæga tilhneigingu til þunglyndis – langt fyrir ofan okkur.