Það er sálarskemmandi að fara inn á Facebook þessa daganna vegna geðvonskunnar og skítkastsins í fylgismönnum forsetaframbjóðenda. Þetta eru sýnist mér fremur fámennir hópar en þeir láta öllum illum látum. Virðast halda að hægt sé að vinna baráttuna í innbyrðis rifrildi á Fésinu.

Afþreyingar leitar maður í Evrópukeppninni í fótbolta. Leikirnir hafa verið misskemmtilegir, en það er svosem ekki nýtt í svona keppnum. Hins vegar ber svo við, ólíkt því sem maður hefur stundum upplifað, að það eru liðin sem eru sannanlega best sem standa eftir nú þegar er komið í fjögurra liða úrslit.

Það eru stórir leikir framundan, Spánn-Portúgal og Þýskaland-Ítalía. Öll þessi lið hafa í sínum röðum snillinga sem geta lyft leiknum á hærra plan, Inesta, Ronaldo, Pirlo og svo er það leikmaður eins og Mario Gomez sem kemur eiginlega aldrei við boltann í leiknum en skorar samt.

Við gætum sem hægast fengið endurtekið efni úr síðustu Evrópukeppni, þegar Spánn og Þýskaland léku til úrslita.

Spánverjar geta orðið fyrsta liðið til að vinna þrjú stórmót í röð, en þeir eru heimsmeistarar og Evrópumeistarar frá því fyrir fjórum árum. Reyndar virðist núverandi landslið Spánverja líklegt til að fara í sögubækurnar sem eitt allrabesta fótboltalið fyrr og síðar.

Andrés Inesta, einn snjallasti fótboltamaður í heimi.