Það væri til bóta ef hægt væri að riðla flokkslínum í fleiri málum.

Að ríkisstjórn segi þinginu ekki hvernig það á að sitja eða standa.

Því ríkisstjórnin fer með framkvæmdavald, en Alþingi löggjafarvald.

Sumir þingmenn virðast halda að þetta eigi að vera á hinn veginn.

Einar Kr. Guðfinnsson, fyrrverandi sjávarútvegs- og landbúnaðarráðherra, skrifar grein í Moggann í dag þar sem hann gerir mikið úr því hvað þetta séu ómöguleg vinnubrögð.

Alveg burtséð frá því hvað mönnum finnst um ESB, þá væri til bóta ef hægt væri að afgreiða fleiri mál með þessum hætti.

Þannig að flokkslegur þvergirðingur ráði ekki endilega för.

Ég hef átt samtöl við fólk sem sat á þingi fyrir Sjálfstæðisflokkinn á síðustu árum Davíðs Oddssonar sem flokksformanns.

Það hefur nöturlegar minningar um hversu einræðið var orðið sterkt í flokknum, enginn dirfðist að ganga gegn línu formannsins.

Við munum öll frá þeim tíma hvað það var leiðinlegt að heyra þingmenn reyna að verja ýmsar gjörðir sem þeir trúðu ekki á.

Auðvitað er ljóst að þessi afgreiðsla ESB umsóknar helgast af því að stjórnarflokkarnir geta ekki komið sér saman um málið. En um leið mætti hugsa sér að þetta sé vísir að bættri stjórnskipan.

Það er engin stórkostleg dyggð að allir hugsi eins og þrammi í takt.

Frekar vantar okkur minni flokksaga og meiri sjálfstæða hugsun.