Maður finnur að farið er að gæta vaxandi óþreyju með sérstaka saksóknarann. Þetta hefur brotist fram eftir viðtal sem birtist við hann fyrr í vikunni.

Viðtalið var ekki mjög heppilegt og maður veit ekki alveg hvað vakti fyrir Ólafi Haukssyni. Var þetta aðferð hans til að segja að hann þyrfti að fá fleiri starfsmenn, meira fjármagn, betri aðstöðu?

Því það þarf embætti hans vissulega.

En það er mjög mikilvægt að við stöndum með embættinu – eins og sakir standa höfum við vart úr öðru að moða en saksóknaranum og rannsóknarnefnd Alþingis í leitinni að réttlæti.

Fjármálaeftirlitið og efnahagsbrotadeild lögreglunnar virðast eiginlega vera úr leik.

Það er afar mikilvægt að þeir sem telja sig hafa upplýsingar um saknæmt athæfi komi þeim til saksóknarans eða rannsóknarnefndarinnar – og að við sláum skjaldborg um þessa aðila.

Þeir munu þurfa á vernd almenningsálitsins að halda; það er verra ef það snýst alltof fljótt gegn þeim.

Ég hef ekki trú á öðru en að þeir ætli að gera sitt besta. Og vonandi hafa þeir líka vit á að nýta þá krafta sem Eva Joly býður fram.