Flestir munu vinna sig út úr þessu, segir hagfræðingur hjá ASÍ.

Jú, það er sjálfsagt rétt. En ég er ekki viss um að þetta sé boðskapurinn sem fólk vill heyra frá Alþýðusambandinu.

Mér er minnistætt viðtal sem var tekið í upphafi kreppunnar við bæjarstjóra úti á landi. Hann ráðlagði fólki sem er komið í skuldafen að skila lyklunum að húsum sínum. Sagði að sjálfur hefði hann eytt tuttugu árum í að borga húskofa eftir verðbólgufárið upp úr 1980.

Hann sæi eftir að hafa eytt tíma sínum og kröftum með þessum hætti.

Ævi sinni.

Guðmundur Ólafsson hagfræðingur talar um þetta í viðtali við DV.

Fréttin er svohljóðandi:

Guðmundur Ólafsson hagfræðingur segir að ríkisstjórnin hafi ekkert gert sem gefi fólki í fjárhagsvanda ástæðu til að borga áfram af lánum sínum. Hann segir nauðsynlegt að setja lög sem feli í sér að lánveitendur geti ekki rukkað fólk umfram þær eignir sem eigi að vera veð fyrir lánunum. Um 140 milljarða kostar að færa höfuðstól lána aftur um eitt ár.

„Það er fráleitt fyrir þá sem hafa fjárhagsstöðu í rúst að reyna að borga áfram af lánunum sínum. Það er bara vitleysa,“ segir Guðmundur. Við myndun nýrrar ríkisstjórnar voru þau fyrirheit gefin að slá ætti skjaldborg um heimilin. Frumvörp um greiðsluaðlögun og greiðslujöfnun hafa litið dagsins ljós en nú síðast frumvarp um breytingu á lögum um aðför. Í því frumvarpi er aðfararfrestur framlengdur úr fimmtán dögum í fjörutíu auk þess sem nauðungarsölum einstaklinga hefur verið frestað fram í september.

Fólki verður heimilað að búa áfram í húsnæði sínu í allt að eitt ár eftir að bankinn hefur tekið húsið, gegn leigugreiðslum. Ef frumvarpið verður samþykkt tekur einnig gildi sú breyting að nýr fyrningarfrestur kröfu, sem lýst er í þrotabú, verði tvö ár. Það þýðir að missi fólk húsið sitt verður ekki hægt að sækja eftirstöðvar skuldarinnar lengur en í tvö ár.

Lánveitandinn taki einnig áhættu
Guðmundur segist lengi hafa verið þeirrar skoðunar að setja eigi þær reglur að ekki sé hægt að innheimta meira af skuldaranum en sem nemur því sem fæst fyrir veðið. „Sá sem lánar verður að taka einhverja áhættu á veðinu. Þannig er málum háttað í Bandaríkjunum, að því er ég best veit,“ segir hann. Gumundur segir núverandi fyrirkomulag afleitt. „Menn taka kannski veð í tíu milljóna króna bíl en leysa hann svo til sín og selja á eina milljón. Svo krefjast þeir níu milljóna af þeim sem ekki gat borgað,“ útskýrir hann og bætir því við að ríkisstjórnin þurfi einfaldlega að breyta þessum lögum. „Mér finnst sjálfsagt að láta þetta gilda um öll lán í framtíðinni þannig að lánveitendur beri hluta af ábyrgðinni og sjái hag sinn í því að fá sem mest fyrir eignirnar.“