Hér kemur fram í lítilli frétt í Mogganum að Bakkabræðurnir sem ábyggilega munu neita því að hafa verið með í samanteknum ráðum um að græða á falli krónunnar, krefjist þess að íslenskir bankar greiði þeim 120-140 milljarða króna vegna afleiðusamninga vegna krónufalls.

Talið er að kröfur innlendra fyrirtækja á hendur Exista nemi 125 milljörðum króna.

Margt í þessu er óskiljanlegt, en einum gjörningnum er lýst svona í fréttinni:

„Þegar Kaupþing ætlaði að taka Exista yfir í desember nýttu Ágúst og Lýður heimild hluthafafundar til hlutafjáraukningar og lögðu einn milljarð í handbæru fé inn í félagið á genginu 0,02. Við það eignuðust þeir tæplega 78% í Exista í gegnum félagið BBR. Kaupþing tók hins vegar yfir félag þeirra bræðra, sem var fyrir hlutafjáraukninguna stærsti einstaki hluthafinn, Bakkabræður Holding, og eignaðist 10,4% í félaginu.“

En ef ég skil rétt var hluturinn í félaginu þarna kominn niður í 2 aura sem hentaði Bakkabræðrum ágætlega á þessum tímapunkti.

Gengi Exista fór hæst í ríflega 40 fyrir hlutinn.