Það væri kannski verðugt umfjöllunarefni að komast einhvern tíma að því hversu margir Íslendingar töpuðu peningum á Decode og hversu miklar fjárhæðir það voru.

Hér var sett upp sérkennileg mylla, byggð á væntingum, ofurbjartsýni og vanþekkingu, stjórnmálamenn og fjölmiðlar tóku þátt – um tíma var það svo að menn voru álitnir heimskir ef þeir voru ekki að setja sparifé sitt í Decode.

En svo er önnur hlið á málinu.

Nú lítur út fyrir að Decode sé að líða undir lok. Það er mjög sorglegt, því innan fyrirtækisins hefur verið unnið að gagnmerkum vísindarannsóknum.

Hvað verður af þessum rannsóknargögnum ef fyrirtækið fer í þrot?

Það hlýtur að teljast mikilvægt að sem mest af þeim nýtist áfram í vísindasamfélaginu hér heima.

Er mögulegt að binda svo um hnútana?