AMX er fjölmiðill sem birtir ýmsa smámola, suma spaugilega, undir yfirskriftinni Fuglahvísl.

Um daginn var skrifað þarna að fólk innan Samfylkingarinnar væri að biðja mig að koma í framboð fyrir flokkinn. Ég ætti jafnvel að verða menntamálaráðherra (sic!).

Staðreyndin er auðvitað sú að enginn hafði samband við mig þaðan, enda hefur mér aldrei dottið í hug að á þeim bæ væri neinn áhugi á að fá mig í framboð.

Og í mola frá því í gær er talað um að ég sé orðinn stuðningsmaður Guðlaugs Þórs Þórðarsonar í prófkjöri í Sjálfstæðisflokknum.

(Guðlaugur Þór er sá stjórnmálamaður sem AMX er hvað mest í nöp við, ástæðan er meðal annars sú að hann lagði til atlögu við Björn Bjarnason í prófkjöri. Þetta var það sem heitir á frönsku faux pas.)

Ástæðan er sú að ég skrifaði litla grein þar sem ég lagði út af skoðanakönnunum sem koma sér ansi illa fyrir Guðlaug, en vel fyrir mótherja hans innan flokksins, Bjarna Ben og Illuga Gunnarsson.

Tíminn líður hratt – og kannski hefur þeim á AMX einfaldlega yfirsést greinin sem ég skrifaði um vini Guðlaugs innan Landsbankans undir yfirskriftinni Sjálfstæðisbankinn. Þessi grein birtist um áramótin.

Ég veit að ég á ekki að elta ólar við þetta, en æ, ég læt það samt flakka.

Annars segir DV þetta um baráttu þeirra Guðlaugs og Illuga, blaðið kallar það blóðugt stríð.