Í Kiljunni í kvöld verður fjallað um enska skáldið W.H. Auden og tvær Íslandsferðir hans. Auden kom hingaði í fyrra skiptið 1936, skrifaði ferðabók og orti frægt kvæði sem Magnús Ásgeirsson þýddi.

Hann kom hingað í annað sinn snemma á sjöunda áratugnum og sat þá frægt kokkteilboð með Tómasi Guðmundssyni, Gunnari Gunnarsyni og Þórbergi Þórðarsyni.

Ögmundur Bjarnason læknir hefur þýtt mikið af kvæðum eftir Auden en hann hefur einnig ort stórsnjallt kvæði þar sem er sérstaklega einblínt á seinni ferð Audens til Íslands.

Má segja að þetta kvæði Ögmundar sé tilefni þess að nú er fjallað um Auden.

Annars þekkja líklega flestir Auden vegna kvæðisins Stop All the Clocks sem var flutt á magnaðan hátt í kvikmyndinni Fjögur brúðkaup og jarðarför.

Í þættinum verður rætt við slóvenskan rithöfund, Brinu Svit, en hún hefur dvalið í Gunnarshúsi undanfarið við að skrifa bók sem hún nefnir Nótt í Reykjavík. Brina Svit skrifar núorðið á frönsku og hefur fengið verðlaun fyrir bækur sínar frá frönsku akademíunni.

Bragi er á sínum stað í þættinum sem og Kolbrún og Páll Baldvin, en þau ætla að fara yfir glæpasögurnar íslensku sem komu út fyrir jólin.