Borg lista og vísinda í Valencia – Ciudad de las artes y de las ciencias – er stórkostlegt byggingalistaverk. Eins og eitthvað sem hefur fallið utan úr geimnum. Arkitektinn er spænskur snillingur, sjálfur frá Valencia, Santiago Calatrava, fæddur 1950.

Borgin er byggð í gömlum árfarvegi sem hefur verið breytt í mikinn skemmtigarð og skiptist í nokkur meginsvæði. Stærst eru listamiðstöðin og vísindasafnið. Í síðarnefndu byggingunni eyddum við Kári broti úr tveimur dögum og náðum ekki að skoða nema hluta af safninu.

Form bygginganna er svo tilkomumikið að það er hægt að ganga þarna um dag eftir dag og horfa bara. Stærðin er ótrúleg. Sagt er að vísindasafnið sé í laginu eins og beinagrind risaeðlu.

Sjávarsafnið, Oceanografic, inniheldur glæsilegasta sædýrasafn Evrópu með hákörlum, rostungum, mörgæsum, höfrungum, hvölum og alls konar fiskum. Glæsilegast er að ganga í gegnum risastóran vatnstank neðanjarðar og horfa á hákarla og skjaldbökur og suðræna fiska synda allt í kringum sig.

Hemisferic er í laginu eins og auga. Þetta er hvelfing þar sem hægt er að skoða líkan af himingeimnum en er líka bíóhús þar sem eru sýndar þrívíddarmyndir. Við vorum heppnir og fengum miða.