Kann að vera að mikilla tíðinda sé að vænta í stjórnmálunum er Sjálfstæðisflokkurinn segir skilið við einangrunarstefnu Davíðs Oddssonar í Evrópumálum? Krónan tók enn eina dýfu á síðustu tveimur vikum, vaxtapólitík Seðlabankans er ekki að hafa næg áhrif – í atvinnulífinu og víða í Sjálfstæðisflokknum virðast menn gera sér grein fyrir að stefnubreytingar er þörf.
Nú í vikunni hélt Rannsóknarmiðstöð í efnahags- og stjórnmálum ráðstefnu um sjálfstæði gjaldmiðla. Í RSE starfa mestu frjálshyggjumennirnir innan vébanda Sjálfstæðisflokksins. Þeir virðast líka skilja að stefnubreytingar er þörf – að krónan er skaðleg fyrirtækjum og almenningi og er orðinn helsti óróavaldurinn í efnahagslífinu.
Tónninn í sjálfstæðismönnum núna er hvort hægt sé að finna aðrar leiðir til að taka upp evruna en aðild að Evrópusambandinu. Áhöld eru um hvort það sé mögulegt. En stóru tíðindin eru þau að flokkurinn er að þoka sér frá þeirri afstöðu að EES-samningurinn fullnægi þörfum Íslands.
Líklega verður þó farið nokkuð varlega af tillitssemi við Seðlabankastjórann – það má ekki bjóða honum opinberlega birginn. En Geir Haarde hefur ágæt tök á flokknum sem mun væntanlega fylgja formanni sínum í þessum málum eins og öðrum.
Nema verði uppreisn frá hægri. Maður finnur óneitanlega smá titring í flokknum yfir því hvað hann er að verða yfirmáta sósíal-demókratískur og grænn – og þá kannski ekki síst í borgarstjórninni.
Ekki mun standa á Samfylkingunni að kasta krónunni. Má vera að þessi mál verði komin í pólitískan farveg fyrr en margan hugði?
