Það fréttist af einum manni sem er dónalegur við erlenda starfsstúlku í bakaríi og af stað fer umræðan um að Íslendingar séu hrokafullir og vondir við útlendinga.

Ég reyni að vera aldrei dónalegur við afgreiðslufólk – eða bara helst ekki neinn – en síðast þegar ég missti mig við einhvern var það við skrifstofufólk hjá Bílastæðasjóði.

Það var íslenskt fólk

Svo er náttúrlega til í dæminu að afgreiðslufólk sé sauðir og reyni óskaplega á þolrifin. Þetta á við bæði um Íslendinga og útlendinga. En maður á samt að reyna að stilla sig. Annars þarf maður kannski á reiðimeðferð að halda.

Sjálfur drekk ég kaffi á kaffihúsi í miðbænum á nánast hverjum morgni. Flest afgreiðslufólkið þar er erlent – fá Kenya, Ungverjalandi, Ítalíu. Og það er yfirleitt frábært þótt það tali ekki sérlega góða íslensku.