Í Kiljunni í kvöld verða sýndar sögulegar kvikmyndir frá Búkharín-réttarhöldunum í Moskvu árið 1938. Á myndunum má sjá Halldór Laxness í hópi áhorfenda. Þessar myndir hafa ekki áður verið birtar hér á landi.

Halldór Guðmundsson, höfundur ævisögu Laxness, kemur í þáttinn til að skoða myndirnar og ræða um þær.

Hinn kornungi og bráðsnjalli rithöfundur Daniel Kehlmann, höfundur metsölubókarinnar margföldu Mæling heimsins, er gestur þáttarins.

Það er einnig kanadísk/breski landfræðingurinn Jack Ives. Hann hefur stundað rannsóknir í Skaftafelli síðan 1952 og er nú að gefa út bók um sögu og landafræði þjóðgarðsins. Í leiðangri á Vatnajökul 1953 týndust tveir félagar Ives og spurðist ekkert til þeirra fyrr en 2006 að jökullinn bar með sér leifar af búnaði þeirra.

Þórólfur Árnason velur uppáhaldsbók sína og Bragi er á sínum stað. Svo verður fjallað um rit eftir Ishmael Beah, Ian Rankin, Einar Guðmundsson og Ólaf Jóhann Ólafsson.