Einhvern veginn er Tom Cruise að leika Claus Von Stauffenberg svo óskaplegt að það tekur engu tali. Engin furða að Þjóðverjar hafi risið upp og vilji ekki að þessi mynd verði gerð.
Það er eitthvað við Cruise sem virkar mjög ankanalega – maðurinn er eiginlega hálfgert frík. Kannski ekki skrítið að hann sé orðinn besti vinur Beckham hjónanna.
Áðan var ég í bókabúð Dussmans í Friedrichstrasse í Berlín. Sá þar bók eftir Arnald og tvær íslenskar bíómyndir – 101 Reykjavík og Mýrina.
Datt svona í framhjáhlaupi í hug hvort við gætum fengið Cruise til að koma til Íslands til að leika einhverja af þjóðhetjum okkar í kvikmynd.
Gunnar á Hlíðarenda, Jón Sigurðsson, Fjalla–Eyvind?
