Bhasha Mukherjee, sem seinast hlaut nafnbótina Ungfrú England, hefur sett titilinn til hliðar vegna COVID-19. Hún var að sinna góðgerðastarfi í Indlandi, en ákvað að snúa aftur til Englands til að styrkja heilbrigðiskerfið, þar sem hún er menntaður læknir. Frá þessu greinir Sky-fréttastofan.
Bhasha mun starfa við Pilgrim-spítalann í Boston, Lincolnshire, en hún starfaði þar áður en hún var kjörin Ungfrú England.
Hún sagði að starf sitt á Indlandi hefði verið mikilvægt, en að færni hennar sem læknir skipti meira máli á tímum sem þessum.
„Við fórum á svo mörg heimili og munaðarleysingjahæli, þar voru litlar yfirgefnar stelpur og þannig… en undir lok ferðarinnar… fannst mér ekki í lagi að bera þessa krúnu og mæta á þessa viðburði.“
Bhasha er nú í einangrun í Derby-borg og bíður eftir því að fá leyfi til að hefja störf á ný.