Fyrirsætan Paige Woolen fékk nóg af óviðeigandi skilaboðum sem hún var að fá frá karlmönnum. Hún stofnaði Instagram-síðu til að birta skilaboðin og afhjúpa karlmennina á bakvið þau.
Paige er með 173 þúsund fylgjendur á Instagram. Hún fær aragrúa af skilaboðum á hverjum degi, mörg hver óviðeigandi og ógeðsleg. Í von um að stöðva mennina sem senda henni svona skilaboð ákvað hún að vekja athygli á þeim.
Hún stofnaði síðuna „Dudes in the DM“ fyrir viku síðan og er þegar komin með yfir fjórtán þúsund fylgjendur.
Á síðunni birtir hún skjáskot af skilaboðum sem hún og aðrar konur fá frá karlmönnum. Sumir karlmenn eru nafngreindir en aðrir ekki.
„Ég deili myndum af mér í bikiní og á nærfötunum og fæ þar af leiðandi mikið af jákvæðri og neikvæðri athygli,“ segir Paige við Jam Press.
„Ég hef átt erfitt með neikvæðu athyglina, drusluskömmunina og allar hótanirnar, bara því ég er í bikiníi. Ég trúi því ekki að nekt sé kynferðisleg. Það er mismunandi hvað fólk telur sig kynþokkafullt. Þú átt ekki að skammast þín fyrir það.“
Paige svarar stundum skilaboðunum og grípur þá í húmorinn.
