Elísabet Ósk Thorlacius veit ekki í hvaða stjörnumerki hún er. Hún er fædd 21. júní og lendir þar akkúrat á milli tvíburamerkisins og krabbamerkisins.
„Frá því að ég var lítil hélt ég að ég væri tvíburi eins og allt sagði en svo var mér bent á að ég væri krabbi. Ég fór að leita mér upplýsinga á netinu og fæ misvísandi upplýsingar um hvort ég sé tvíburi eða krabbi,“ segir Elísabet Ósk í færslu inn á Góða Systir. Færslan hefur heldur betur vakið mikil viðbrögð og hafa yfir 150 ummæli verið skráð við færsluna þegar greinin er skrifuð.
DV heyrði í Elísabetu sem sagðist vera engu nær hvoru stjörnumerkinu hún tilheyrir.
„Þetta hefur valdið mér mjög miklu hugarangri í mörg ár,“ segir hún.
Þrátt fyrir öll svörin frá góðum systrum er Elísabet engu nær. Ein kona sagði hana vera tvíbura samkvæmt almanaki HÍ á meðan önnur sagði það fara eftir því hvaða ár hún væri fædd. Ef það er hlaupár þá færist stjörnumerki um dag.
„Það er engin niðurstaða því miður. Ég virðist vera fædd inn í bæði merkin,“ segir Elísabet Ósk.
„Það voru margar að nefna við mig „The Cusp“ sem ég hafði aldrei heyrt um áður. Það virðist þýða að „þú ert næstum eitthvað en getur verið hitt.“ Í raun verðurðu sjálf að ákveða í hvoru stjörnumerkinu þú finnur þig. Hvað á best við þig. Sem mér finnst ofboðslega erfitt að gera því ég finn margt sem á við mig í tvíburamerkinu en einnig krabbamerkinu,“ segir hún.
„Svo sögðu einnig margar við mig að það færi eftir klukkan hvað ég fæddist og hvar.“
Elísabet Ósk segir að undrun hennar hafi ekki stoppað þarna.
„Ég fékk líka lítið sjokk þegar ein nefndi að 21. mars væri líka á „The Cusp“ en það er afmælisdagur sonar míns. Ég hef alltaf haldið að hann væri hrútur en nú þegar ég les mér til um það þá er hann á milli hrútamerkisins og nautamerkisins.“
