Gildir 8. – 14. desember
Hrútur
21. mars–19. apríl
Þú hefur leyft þér að dreyma stórt allt þetta ár en eitthvað hefur vantað upp á framkvæmdina. Það er lítið eftir af árinu, aðeins nokkrar dagar og þú ákveður að enda það með stæl. Þú grefur upp markmiðabókina þína og skráir niður nákvæmlega hvað þú ætlar að gera síðustu daga ársins 2019 og hvernig þú ætlar að hefja 2020 með hvelli.
Naut
20. apríl–20. maí
Þú hefur haldið þig pínulítið til hlés undanfarið og þú virðist ekki fullkomlega átta þig á þínum stað í þessum heimi um þessar mundir. Þú færð gleðilegar fréttir í vikunni og byrjar algjörlega óvænt að skipuleggja langt og skemmtilegt ferðalag. Þetta ferðalag á eftir að endurnæra þig en það er samt ekki alveg á næsta leiti.
Tvíburar
21. maí–21. júní
Það er ekki oft sem hægt er að segja að tvíburi sé í jafnvægi en þú ert svo sannarlega í ágætu jafnvægi um þessar mundir. Þú uppgötvar að hamingja þín stendur og fellur með þér og þú ætlar ekki að leyfa neinum að draga þig niður. Óvæntur gestur setur sinn svip á heimilislífið og það á góðan hátt.
Krabbi
22. júní–22. júlí
Það eru miklar breytingar í lífi þínu um þessar mundir, bæði veraldlegar og andlegar. Tilfinningalíf þitt blómstrar nú um stundir og mun það verða vel nært af ást og hamingju langt fram á næsta ár, og jafnvel enn lengur ef þú heldur rétt á spilunum. Þetta er mikill umbrotatími en allar breytingar jákvæðar.
Ljón
23. júlí–22. ágúst
Það umlykur þig mikil bjartsýni um þessar mundir. Ef þú hefur verið að hugsa um að gera stórtækar breytingar á lífi þínu, hvort sem varðar heilsuna, einkalífið eða vinnuna, þá kemur þú þessum breytingum af stað, því með jákvæðu hugarfari er allt mögulegt og ekkert verkefni of stórt.
Meyja
23. ágúst–22 .sept
Það er mikið að gerast í þínu lífinu núna. Fram til áramóta hrynja tækifærin til þín eitt af öðru. Þú ert alveg á haus en verður að dusta rykið af gleraugunum og skoða þessi tækifæri vandlega. Kannski er nefnilega kominn tími til að breyta til og hefja nýja árið á nýjum stað. Hver veit? Líklegast bara þú.
Vog
23. sept–22. okt
Það er spennandi viðskiptatækifæri í vændum sem heillar þig og gæti krafist þess að þú tækir þér hlé frá hversdagslífinu og legðir land undir fót. Þá er einnig önnur ferð í kortunum hjá þér en sú ferð tengist heimsókn til vinar sem þarf á þinni hjálp að halda. Þessi aðstoð er í formi stuðnings – ekki peninga.
Sporðdreki
23. okt–21. nóv
Þú ert hreint út sagt uppgefin/n og þarft að komast í langt frí – lengra en jólafríið er. Þú skalt eyða nokkrum af frídögunum þínum í að ná að slaka almennilega á á næstunni, áður en þú brennur út. Það er nefnilega svo magnað að þegar maður slakar á þá fær maður aukinn kraft.
Bogmaður
22. nóv–21. des
Það hefur verið gengið hart að þér síðustu vikur og þú ert komin/n að þolmörkum. Hins vegar verður glatt á hjalla hjá þér þessi jól, því annir síðustu vikna hafa gefið vel í aðra hönd og þú nærð að gera vel við þig og þína í mat og drykk. Njóttu þess á meðan það varir og mundu að finna tíma fyrir sjálfa/n þig.
Steingeit
22. des–19. janúar
Nú þarft þú að búa þig undir algjörlega æðislega viku elsku steingeit. Það er allt að gerast í kringum þig og þú laðar að þig yndislegt fólk. Einhleypar steingeitur geta átt von á að verða ástfangnar sem aldrei fyrr og það á mjög hvatvísan hátt, sem er algjörlega út úr karakter. En stundum er bara gott að fara út úr boxinu.
Vatnsberi
20. janúar–18. febrúar
Þú ákveður að lækka þig um einn gír og endurmeta hvar þú stendur, enda nálgast áramótin óðfluga. Svo virðist sem þú sért að fara að skipta um vinnu eða demba þér í nám. Þú ert allavega að íhuga það alvarlega og virðist sem þú hefjir nýja árið á nýjum áherslum og í nýju umhverfi.
Fiskar
19. febrúar–20. mars
Þú hefur eytt mikilli orku þetta árið í að klífa metorðastigann. Þú hefur lagt hart að þér og finnst eins og vinnan ætti að vera búin að bera ávöxt. Sú er þau ekki raunin og eru það mikil vonbrigði. Ekki festast í volæði og depurð. Það er heill heimur að bíða eftir þér ef þú opnar hjarta þitt.
8. desember – Baldur Guðlaugsson hæstaréttarlögmaður, 73 ára
9. desember – Ævar Þór Benediktsson listamaður, 35 ára
10. desember – Sigga Dögg kynfræðingur, 37 ára
11. desember – Bryndís Ásmundsdóttir, söng- og leikkona, 44 ára
12. desember – Eygló Harðardóttir, fyrrverandi stjórnmálakona, 47 ára
13. desember – Guðmundur Torfason knattspyrnukappi, 58 ára
14. desember – Guðmundur Ólafsson leikari, 68 ára