Eiginmaður hennar, Scott Shriner, gerði garðinn frægan með bandarísku hljómsveitinni Weezer sem átti hvern slagarann á fætur öðrum á 10. áratug liðinnar aldar og upp úr aldamótum. Scott er bassaleikari hljómsveitarinnar.
Í frétt Mail Online kemur fram að maðurinn sem Lauren beindi skotvopninu að hafi lent í þriggja bíla árekstri um miðjan dag. Hann flúði af vettvangi fótgangandi ásamt tveimur öðrum mönnum í bílnum.
Maðurinn mun hafa reynt að fela sig fyrir lögreglumönnum, meðal annars með því að afklæðast og fá sér sundsprett í sundlaug við hús í nágrenninu. Þá er hann sagður hafa vökvað blóm við sundlaugina. Mun hann hafa gert til að reyna að villa um fyrir lögreglu og þykjast vera venjulegur íbúi.
Lauren, sem er meðal annars rithöfundur, er sögð hafa stokkið út úr húsi sínu og beint skotvopni að manninum sem var kominn inn í garðinn hjá henni. Ekki liggur fyrir hvort hún hafi skotið úr byssunni. Lögregla er sögð hafa margítrekað við hana að leggja vopnið frá sér sem hún gerði ekki. Endaði það þannig að hún var skotin í öxlina. Hún hljóp í burtu í kjölfarið og inn í húsið sitt en kom út stuttu síðar ásamt barnapíunni sinni.
Lauren mun hafa sagt við lögreglu, þegar hún var handtekin, að hún hafi verið að verja eign sína og óttast um eigið öryggi. Maðurinn sem Lauren miðaði byssunni að var einnig handtekinn.
Lauren var flutt á slysadeild en meiðsli hennar eru ekki alvarleg, að því er fram kemur f fréttum bandarískra fjölmiðla. Ekki liggur fyrir hvort Scott Shriner hafi verið heima þegar atvikið átti sér stað en hann undirbýr sig nú fyrir tónleika Weezer sem fram fara á Coachella-hátíðinni á laugardag.
