Breski ofurnjósnarinn Oleg Gordievsky, sem var rússneskur að uppruna eins og nafnið bendir til, er látinn 86 ára að aldri. Hann var árum saman háttsettur innan sovésku leyniþjónustunnar KGB en um leið var hann á mála hjá bresku leyniþjónustunni MI6.

BBC skýrir frá þessu og segir að hann hafi látist á heimili sínu í Surrey og að ekki leiki grunur á að eitthvað óeðlilegt hafi valdið dauða hans. Samt sem áður munu réttarmeinafræðingar bresku hryðjuverkalögreglunnar sjá um krufningu á líki hans.

Gordievsky var talinn mikilvægasti njósnari Breta frá upphafi því hann dældi í þá upplýsingum beint frá toppi KGB á tímum kalda stríðsins.

KGB fór að gruna hann um græsku 1985 en hann náði rétt svo að komast úr landi með því að fela sig í farangursrými bifreiðar sem var ekið frá Rússlandi til Finnlands.