Starfslokauppgjör Ragnars Þórs Ingólfssonar frá VR, biðlaun og ótekið orlof, nam um 10 milljónum króna samkvæmt frétt Morgunblaðsins í morgun. Þar kemur fram að Ragnar Þór, sem settist á þing fyrir Flokk fólksins eftir síðustu alþingiskosningar, hefði getað afþakkað biðlaunin í ljósi þess að hann var kominn með nýja vinnu á Alþingi.

Það gerði Ragnar Þór hins vegar ekki. Hann átti rétt á sex mánaða biðlaunum samkvæmt ráðningasamningi og óskaði hann eftir eingreiðslu þeirra og hefur uppgjörið þegar farið fram.

Fréttin hefur vakið nokkra athygli og einn þeirra sem deildi henni er Sigurður G. Guðjónsson, hæstaréttarlögmaður.

„Ragnar Þór Ingólfsson er eins og svínin í Dýrabæ. Tekur mikið til sín af félagsmönnum í VR og skattgreiðendum samtímis. Er jafnari en aðrir launþegar. Þetta uppgjör samrýmist illa almennu reglum varðandi laun í uppsagnarfresti hjá félagsmönnum VR.Einhvern tíma hefði Ragnar Þór verkalýðsforkólfur hrópað spilling, spilling ….. og Inga Sæland og fleiri þeim lík tekið undir,“ skrifar Sigurður.