Pósturinn og Slysavarnafélagið Landsbjörg dreifa gjafabréfum til allra barna á Íslandi á aldrinum 10-15 ára. Þau geta framvísað gjafabréfinu á öllum sölustöðum flugelda og fengið hlífðargleraugu. Gunnar Stefánsson, skrifstofustjóri Slysavarnafélagsins Landsbjargar, segir að augnslysum hjá þessum aldurshópi hafi fækkað mikið með tilkomu gleraugnanna.

„Það eru mörg dæmi um að gleraugun hafi dregið stórlega úr skaða og til marks um árangurinn má nefna að enginn hefur hlotið augnskaða vegna flugelda síðastliðin tvö ár. Þó að við höfðum sérstaklega til barna er líka mikilvægt að minna fullorðna á flugeldagleraugun.“

Algengustu slysin vegna flugelda verða á höndum, andliti og augum.

„Notkun vettlinga og hanska dregur úr líkum á áverkum á höndum. En flest slysin verða vegna vankunnáttu eða óvarkárni,“ segir Gunnar.

Bæklingi um meðferð flugelda, flugeldagleraugu og brunavarnir ásamt gjafabréfinu verður dreift á 30 þúsund heimili.

„Pósturinn sér um dreifinguna en hann ásamt Sjóvá, Blindrafélaginu og Slysavarnafélaginu Landsbjörg kosta þetta mikilvæga verkefni. Nánari upplýsingar um eldvarnir heimilisins má svo finna á vef Eldvarnarbandalagsins. Við hvetjum alla til að kynna sér efnið vel og óskum öllum slysalausrar hátíðar,“ segir Gunnar.