Bjarni Benediktsson, forsætisráðherra og formaður Sjálfstæðisflokksins, segir að kennarar hafi nýtt sér verkfallsvopnið með handahófskenndum og ósanngjörnum hætti.

Þetta segir Bjarni í athugasemd sem hann skrifaði í morgun við færslu á Facebook-síðu sinni. Fyrst var greint frá þessu í kosningavakt Vísis.

Guðlaug Ýr Þórsdóttir biðlaði til Bjarna í athugasemd að stíga inn í ótímabundið verkfall kennara gagnvart leikskólabörnum.

„Hér eru foreldrar að missa vinnuna – afleiðingar fyrir okkur örhópinn eru farnar að vera verulega íþyngjandi. Á meðan miðar samningum ekkert áfram, hvenær er nóg, nóg? Eftir 2 mánuði? 3? 6? Við öskrum en hellirinn bergmálar. Og elsku litlu börnin eru að dúsa á vinnustöðum, í pössun hér og þar eða heima með örvæntingarfullu tekjulausu foreldri. Það er magnað að stjórnmálamenn ætli að horfa á þessar aðgerðir blindu auga. Ef þetta er löglegt að eitt stéttarfélag geti eyðilagt líf af handahófi þá þarf að breyta lögum. Og það strax. Við getum ekki beðið eftir nýrri ríkisstjórn,“ sagði Guðlaug í athugasemd sinni í gærkvöldi.

Bjarni svaraði í morgun og sagðist skilja áhyggjur og erfiða stöðu fjölskyldna en tók þó fram að deiluaðilar verði að klára sín mál.

„Á meðan aðilar sitja við samningaborðið þá verðum við að vona að lausn finnist. Það er svo rétt að það er slæmt að hægt sé að nýta verkfallsvopnið með svo handshófskenndum og ósanngjörnum hætti, það getur ekki gengið,“ segir Bjarni.