Brynjar Níelsson, fyrrum þingmaður Sjálfstæðisflokks, kom í gær Áslaugu Örnu Sigurbjörnsdóttur, ráðherra, til varna eftir að hún var harðlega gagnrýnd í grein listamannsins Einars Baldvins Árnasonar. Brynjar ráðlagði listamanninum að finna betri leiðir til að gagnrýna pólitíska andstæðinga en að „sitja við lyklaborðið með samanbitnar varir og klemmdar rasskinnar af reiði og reya að upphefja sjálfan sig með níðskrifum um aðra“.

Sjá nánar: Kemur Áslaugu Örnu til varnar eftir „níðskrif“

Listamaðurinn hefur nú svarað Brynjari í nýrri grein þar sem hann segir að ef einhver sé með klemmdar rasskinnar, þá sé það fyrrum þingmaðurinn sjálfur.

„Það sem stendur þó mest í mér úr skrifum Brynjars er þó ekkert af þessu, heldur sú staðreynd að hann skyldi ætla að ég hefði skrifað greinina mína með klemmdar rasskinnar. Hví ætli hann haldi það? Á því er bara ein sálfræðileg skýring – Brynjar er vanur að klemma þær sjálfur, daginn út og inn – í þeirri veiku von að hans eigin flokkur hætti að ríða honum í rassgatið.“

Einar segir að greinilega hafi verið sannleikskorn að finna í skrifum hans um Áslaugu Örnu enda hafi Sjálfstæðisflokkurinn ræst Brynjar úr Valhöll til að „vinna skítaverk drottnara sinna“. Brynjar sé þó í óþægilegri stöðu, eins og aðrir íhaldssamir Sjálfstæðismenn. Forysta flokksins hati Brynjar  og „niðurlægir hann stöðugt, vitandi að hann hefur ekki kjark til að fara annað“.

„En menn þurfa jú auðvitað að verja hagsmuni sína, og þeir eru ríkir hjá Brynjari. Hann ætlar nefnilega að sjúga ríkisspenann til æviloka – nú í nýrri vinnu hjá mannréttindaráði vinstri grænna. Það er vinna við hæfi, því þetta er auðvitað Sjálfstæðisstefnan í hnotskurn: að nota ríkisvaldið til þess að skapa vinnu fyrir vini sína.“

Einar segist sjálfur hafa haft gaman að Brynjar í gegnum tíðina, jafnvel þótt mikið til hans koma. En sá Brynjar sé löngu dauður „kæfður af flokki sem heldur  honum í gíslingu sem nytsömum sakleysingja, bolabít sem fær stundum að fara út og gelta og góla sig hásan, svo fólk geti ekki heyrt það sem almenningur og jafnvel flokksmenn hvísla og hrópa nýr hærra og hærra – að Sjálfstæðisflokkurinn vinni ekki fyrir fólkið í landinu.“