Donald Trump, forsetaefni Repúblikanaflokksins, er allt annað en sáttur við poppstjörnuna Taylor Swift. Eins og frægt varð ákvað Swift, sem er ein vinsælasta poppstjarna heims um þessar mundir, að lýsa yfir stuðningi við Kamölu Harris, varaforseta Bandaríkjanna og keppinaut Trumps um forsetastólinn. Það gerði Swift rétt eftir sögulegar sjónvarpskappræður Trump og Harris sem hafa að mörgu leyti dregið dilk á eftir sér.
„ÉG HATA TAYLOR SWIFT,“ skrifaði Trump með hástöfum á samfélagsmiðil sinn Truth Social og lét þar við sitja.
Swift studdi einnig Joe Biden í forsetakosningunum árið 2020 og því kom stuðningur hennar kannski ekki mörgum á óvart. Helst var það að hún tæki slaginn að upplýsa opinberlega um stuðning sinn en Trump lét hafa eftir sér á dögunum að hann væri fullviss að hún myndi gjalda fyrir það viðskiptalega.
Trump ætti þó að hemja fýluna því ný skoðanakönnun virðist benda til þess að stuðningsyfirlýsing Swift hafi verið bjarnargreiði því hún virðist fæla kjósendur frá Harris frekar en hitt.
