Gjörningalistamaðurinn Oddur Eysteinn Friðriksson, betur þekktur sem Odee, safnar nú fyrir lögfræðiaðstoð vegna málsóknar Samherja á hendur honum í Bretlandi. Segir hann málið snúast um tjáningarfrelsi, en hann setti upp falska heimasíðu fyrir útgerðarfélagið þar sem hann skrifaði afsökunarbeiðni í nafni þess.
„Ég þarf aðstoð fjöldans, þó það sé andvirði kaffibolla eða einnar máltíðar. Margt smátt gerir eitt stórt. Ég er að safna fyrir lögfræðiaðstoð svo ég standi ekki einn í Hæstarétti Lundúna í næsta mánuði gegn fyrirtæki sem hefur ótakmarkað fjármagn,“ segir Oddur í færslu á samfélagsmiðlum. „Það er gríðarlega mikilvægt að ná söfnunarmarkmiðinu eins fljótt og auðið er. Þetta mál snýst ekki einungis um mig heldur tjáningarfrelsi og mikilvægt hlutverk listamanna sem beina sviðsljósinu á málefni líðandi stundar.“
Téð málsókn er vegna listaverksins „We´re Sorry“ sem Oddur setti upp vorið 2023. Það er á heimasíðu sem hann bjó til og fréttatilkynninga sem hann sendi í nafni Samherja þar sem beðist var afsökunar. Mátti skilja sem svo að Samherji væri að biðjast afsökunar á framkomu sinni í Namibíu sem hefur verið linnulaust í fjölmiðlum undanfarin ár.
Skömmu eftir að verkið fór í loftið gaf Samherji frá sér yfirlýsingu um að óprúttnir aðilar væru að verki sem hefðu sent falsaða tilkynningu í nafni félagsins. Heimasíðan eða fréttatilkynningarnar hefðu ekki nein tengsl við útgerðarfélagið.
Eftir það steig Oddur fram og greindi frá því að gjörningurinn væri lokaverkefni hans í Listaháskóla Íslands. Það yrði til sýningar á Listasafni Reykjavíkur.
Söfnunin fer fram á síðunni Gofundme og hafa þegar safnast 17.600 norskar krónur af 150.000 þúsund króna takmarki. En það eru um 2 milljónir íslenskra króna. Ástæðan fyrir því að Oddur safnar í norskum krónum er sú að hann er búsettur í Noregi og stundar MA nám við KMD háskólann í Björgvin.
Á síðunni segir hann að málsóknin sé nú á leiðinni til dómstóls í London. En þar hafði dómari áður úrskurðað um lögbann á verkið og að Oddur þyrfti að afhenda Samherja lénið. Dómari bannaði þó Samherja að nota lénið fyrr en niðurstaða lægi fyrir í málinu.
„Þessi málsókn snýst ekki aðeins um mig, hún snýst um að verja málfrelsið og hlutverk listarinnar til að kalla þá valdamiklu til ábyrgðar,“ segir Oddur á síðunni. „Ég er nemi og listamaður, ég stend frammi fyrir ofurefli risafyrirtækis sem hefur úr miklu úr að spila.“
Segir hann að lögmenn hans hjá hafi unnið án þóknunar í heilt ár en nú sé komið að tímamótum. Án fjárhagslegs stuðnings sjá hann fram á að þurfa að verja sig einsamall.
„Lögmannateymið mitt hjá Avant-Garde lögmönnum, stýrt af málfrelsislögmanninum Andra Matei, hefur unnið án þóknunar í heilt ár, en nú er komið að mikilvægum tímamótum,“ segir hann.
Oddur hefur margsinnis komist í fjölmiðla á undanförnum árum fyrir gjörninga sína. Meðal annars setti hann af stað heimasíðuna momair.com sem virtist vera heimasíða nýs flugfélags sem lofaði ókeypis flugferðum í heilt ár. Þá hefur hann einnig boðað komu veitingastaðanna Wendy´s og nú síðast Starbucks til Íslands án þess að hafa umboð til þess.
