Viðgerðir á dómkirkju Kaþólsku kirkjunnar í Landakoti eru í fullum gangi. Verkefnið hófst í aprílmánuði en mikilvægasti hluti þess er endurnýjun á þaki kirkjunnar þar sem nánast öllu gömlu þakskífum kirkjunnar verður skipt út. Að auki verður farið í aðrar viðgerðir á kirkjubyggingunni sem og á aðstöðu til helgihalds, til að mynda á innréttingum og endurnýjun tækjabúnaðar.  Markmiðið er að geta fagnað aldarafmæli kirkjunnar árið 2029 með glæsibrag.

Um fjárfreka framkvæmd er að ræða en í færslu á Facebook-síðu Kaþólsku kirkjunnar á Íslandi kemur fram að enn vanti 100 milljónir króna til að standa straum af heildarkostnaði endurbótanna. Er velunnarar kirkjunnar hvattir til þess að leggja hönd á plóg og láta fé af hendi rakna til verkefnisins.