Á fimmtudaginn birti rússneska varnarmálaráðuneytið myndir á Telegram sem sýndu að sögn úkraínskar MiG-29 orustuþotur sem höfðu verið eyðilagðar á Dovhyntseve-flugvellinum. Sögðust Rússar hafa skotið Iskander flugskeytum á völlinn og náð að eyðileggja vélarnar.

Úkraínski herinn svaraði þessari tilkynningu Rússanna og sagði að myndirnar sýni ekki raunverulegar flugvélar heldur eftirlíkingar sem voru notaðar til að blekkja Rússa og það sama eigi við um loftvarnarkerfin sem Rússar töldu sig hafa eyðilagt á flugvellinum, þau hafi einnig verið eftirlíkingar.

Mykola Oleshchuck, foringi í úkraínska flughernum, sagði að eftirlíkingar af flugvélum hafi verið settar upp á flugvöllum nærri Kryvyi Rih í miðhluta landsins og nærri Odesa við Svartahafið. Með þessu hafi flugherinn leikið passífan varnarleik sem varð til þess að Rússar notuðu nokkur Iskander flugskeyti til að granda eftirlíkingum af orustuþotum.