Umdeild tillaga bæjarstjóra Kópavogs tekin fyrir
Bæjarstjórn Kópavogs mun næsta þriðjudag ákveða hvort viðræður verði hafnar um nýtt húsnæði undir stjórnsýslu sveitarfélagsins eða hvort ráðist verði í viðhald á núverandi bæjarskrifstofum. Fari svo að fyrri kosturinn verði fyrir valinu þurfa bæjaryfirvöld að hefja viðræður við annars vegar eigendur Norðurturnsins við Smáralind og hins vegar forsvarsmenn Turnsins við Smáratorg.
Framtíðarstaðsetning bæjarskrifstofanna hefur verið hitamál í Kópavogi síðan í júní í fyrra. Ármann Kr. Ólafsson bæjarstjóri kynnti þá hugmynd um að flytja skrifstofurnar í Norðurturninn við Smáralind. Mánuði síðar var ákveðið að skipa starfshóp, skipaðan fulltrúum allra flokka sem sæti eiga í bæjarstjórninni, sem átti að leysa úr ágreiningi um húsnæðismálin en í desember síðastliðnum varð ljóst að hann kæmist ekki að samkomulagi. Hópurinn skilaði tillögunum tveimur af sér og voru þær kynntar á íbúafundi í Salnum í Kópavogi í byrjun þessarar viku.