Guðmundur Magnússon, sagnfræðingur, veltir ríkisstjórnarsamstarfinu fyrir sér í ljósi þess að Katrín Jakobsdóttir sé að hverfa úr stóli forsætisráðherra og fara í forsetaframboð. Hugsanlegt sé að uppstokkunin verði meiri en margir sjá fyrir í dag.

„Skyldi sá möguleiki vera til umræðu í þeirri stöðu sem nú er í stjórnmálunum að Viðreisn komi inn í ríkisstjórnina í stað VG?“ spyr Guðmundur, sem vakti mikla athygli fyrir útgáfu ævisögu um séra Friðrik Friðriksson fyrir jól. „Þá yrðu menn nú að hafa hraðar hendur. Ég mundi sakna VG en Viðreisn gæti vissulega lyft stjórninni verulega upp og hrist upp í pólitíkinni fram að þingkosningum að ári.“

Katrín hefur verið sögð límið í stjórnarsamstarfi flokkanna þriggja. Guðmundur Ingi Guðbrandsson, félagsmálaráðherra, tekur við stöðu hennar sem formaður VG en hann er ekki talinn líklegur sem næsti forsætisráðherra. Leiðtogarnir hafa verið þöglir um hvernig uppstokkunin verður.

„Kannski gæti þetta hentað Viðreisn, ef í boði væri, þótt hvorki evra né ESB væru á dagskrá,“ segir Guðmundur en viðurkennir að þetta séu aðeins óábyrgar og máske óraunsæjar vangaveltur.