Í tilkynningu frá Slysavarnafélaginu Landsbjörg kemur fram að rétt upp úr klukkan 14 í dag hafi björgunarsveitir á Húsavík og Aðaldal verið kallaðar út vegna vélsleðaslyss við Nykurtjörn við Húsavík, skammt frá skíðasvæðinu á Húsavík.

Þar hafði einstaklingur á vélsleða slasast. Upphaflega hafi verið tilkynnt um að viðkomandi hefði lent í snjóflóði en snjóflóðahætta sé á þessu svæði.

Björgunarfólk á vélsleðum og snjóbílum hafi haldið á staðinn og hlúð að þeim slasaða, búið um hann og komið í sjúkrabörur. Í þeim hafi viðkomandi verið fluttur að björgunarsveitarbíl sem flutti þann slasaða áfram í sjúkrabíl.

Nú rétt fyrir klukkan 16 hafi allir viðbragðsaðilar verið komnir út af hættusvæðinu og á leið heim.