Lögbirtingablaðið birtir í dag dómsorð í máli þar sem maður hefur verið dæmdur í fjögurra og hálfs árs fangelsi fyrir brot gegn fyrrverandi eiginkonu sinni og til að greiða henni 4,5 milljónir króna í miskabætur. Um er að ræða dóm Landsréttar sem kveðinn var upp 15. desember síðastliðinn eftir að maðurinn hafði áfrýjað dómi héraðsdóms frá árinu 2022.
Brotin varða stafræn kynferðisbrot, stórfelldar ærumeiðingar og stórfelld brot í nánu sambandi. Var maðurinn sagðir hafa endurtekið og á alvarlegan hátt ógnað heilsu og velferð fyrrverandi eiginkonu sinnar og barnsmóður.
Fólust brot mannsins í því að á tveggja ára tímabili, 2017-2019, sendi hann á annað hundrað tölvupósta með kynferðislegum ljósmyndum af konunni til vina og kunningja konunnar en að auki voru myndirnar sendar til fjölmiðla og á fleiri staði. Þá birti hann kynferðisleg myndskeið af barnsmóður sinni á vefsíðum og sendi henni ærumeiðandi skilaboð í gegnum SMS og samskiptaforrit eins og Viber og Messenger. Þá lágu til grundvallar dómsins ærumeiðandi símtöl en konan tók sum þeirra upp.
Brotin voru gífurlega umfangsmikil og voru ákæruliðirnir alls 136. Maðurinn neitaði sök í málinu og sagði málið tengjast forsjárdeilu. Héraðsdómur féllst ekki á þau sjónarmið og taldi yfir allan vafa hafið að hann hefði gerst sekur um öll brotin. Þá var litið til þess við ákvörðun refsingarinnar hve mörg, gróf og alvarleg brotin voru.
Að mati dómsins sýndi maðurinn barnsmóður sinni og fyrrverandi konu fullkomið virðingarleysi og rauf við hana trúnað með grófum hætti. Myndirnar sem hann dreifði voru meðal annars myndir sem hún hafði sent honum frá heimalandi sínu þegar kynni voru að takast og í framhaldinu á fyrstu stigum sambandsins. Fullyrti hún að hann hefði lofað að eyða myndefninu sem hefði verið tekið.
Það gerði hann ekki heldur notaði myndirnar sem vopn gegn konunni síðar meir.
Í dómnum kemur fram að vítaverðar hvatir hafi legið að baki verknaði mannsins og að hann ætti sér engar málsbætur.
Héraðsdómur dæmdi manninn á sínum tíma í þriggja ára og níu mánaða fangelsi en Landsréttur þyngdi dóminn upp í fjögurra og hálfs árs fangelsi. Sem fyrr segir hefur ekki tekist að birta manninum dóminn, en hann býr erlendis. Í samræmi við ákvæði sakamálalaga er dómurinn því birtur í Lögbirtingablaðinu.
