Það verður að segjast að það er allt annað en auðvelt að komast í verslun eina sem nánast hangir utan í snarbrattri klettahlíð í Shiniuzhai þjóðgarðinum í Hunan-héraðinu í Kína. Um trékofa er að ræða og er hann í 120 metra hæð.

Það tekur venjulega um 90 mínútur að klifra upp hlíðina en það er kannski ferðarinnar virði því þeir sem koma í búðina fá ókeypis vatnsflösku að launum!

Búðin er sögð vera „einstök“ vegna staðsetningarinnar og þess að hún veitir fjallgöngufólki ákveðið athvarf á leiðinni upp klettavegginn.

Þegar kemur að því að fylla á hillur í versluninni þá notar starfsfólkið siglínur en aðeins einn starfsmaður getur verið inni í einu að sögn Sky News.