Sjötug kona í Afríkuríkinu Úganda varð í gær elsta kona álfunnar til að eignast barn. Konan, Safina Namukwaya, fæddi tvíbura, pilt og stúlku, í gærmorgun á Kvennasjúkrahúsinu í Kampala, höfuðborg landsins.

Móður og börnum heilsast vel eftir fæðinguna en tvíburarnir voru teknir með keisaraskurði. Safina eignaðist stúlku árið 2020, 67 ára að aldri.

Safina naut aðstoðar lækna til að verða ólétt og þá var fylgst vel með henni á meðgöngunni.

Hún upplifði ítrekað fósturmissi þegar hún var yngri og segist hafa orðið fyrir fordómum vegna þess að hún átti engin börn. „Ég ákvað að láta þetta í hendur Guðs og hann hefur svarað bænum mínum,“ sagði Safina um barnalán sitt síðustu ár.

Síðustu mánuðir hafa ekki verið neinn dans á rósum hjá Safinu því hún segir að barnsfaðir hennar hafi verið fljótur að láta sig hverfa þegar hann komst að því að þau ættu von á tvíburum.

„Karlar virðast ekkert allt of hrifnir af því að heyra að maður gangi með fleiri en eitt barn,“ segir hún. „Hann lét ekki einu sinni sjá sig eftir að ég lagðist inn á spítala.“

Það er sjaldgæft að konur eignist börn svona seint á ævinni en þó ekki einsdæmi eins og bent er á í umfjöllun Mail Online.

Árið 2019 eignaðist Erramatti Mangayamma frá Indlandi tvíbura með aðstoð tæknifrjóvgunar. Þá var Erramatti 74 ára en við hlið hennar var eiginmaður hennar til 57 ára, Sitarama Rajarao.