Í færslunni segist Stefán hafa farið niður á Alþingi í hádegismat þar sem hann og eiginkona hans, Steinunn Þóra Árnadóttir, þingkona VG, voru á milli funda. Á leiðinni út var hann stöðvaður af manni sem trúlega taldi að Stefán væri í einhverri valdastöðu þar sem hann gekk út úr þinghúsinu.
„Hann reyndist þremur árum yngri en ég, en leit út fyrir að vera eldri. Hann sagði sögu sína á bjagaðri ensku og barðist allan tímann við tár og ekka,“ segir Stefán en sjálfur er maðurinn búsettur á Íslandi þar sem hann hefur fengið alþjóðlega vernd.
„Fjölskyldan er hins vegar á Gaza og hann sýndi myndir af konunni og börnunum sínum þremur, lýsti því hvernig þau hringdu í hann á hverju kvöldi og lýstu því hvað þau væru hrædd við sprengjurnar. Hann taldi upp fólkið sitt sem hefur fallið á liðnum dögum og vikum. Þetta var eins örvinglaður fjölskyldufaðir á fimmtugsaldri og hægt er að vera – gjörsamlega ráðþrota og spurði í sífellu hvort það væri ekki hægt að finna einhverja leið til að koma fólkinu hans frá Gaza?“
Stefán bendir á að máttleysi manns sé algjört í svona samtali þar sem það eina sem hægt er að gera er að leggja höndina á öxl viðkomandi og lýsa samúð. „Djöfull er þetta allt ömurlegt,“ segir hann að lokum.
Í athugasemd við færslunni segir einn að til sé eitthvað sem heitir fjölskyldusameining í útlendingalögum. Þessi maður þurfi greinilega meiri aðstoð. Stefán segir réttilega að fjölskyldusameining væri mögulega eitthvað sem hægt væri að grípa til ef fólkið kæmist frá Gaza. „En það sækir enginn fólk þangað í miðju umsátri.“
