Fangi á Litla-Hrauni hefur sent tölvupóst á fjölmiðla og boðað verkfall fanga. Segir í skilaboðum hans:
„Fangar á Litla Hrauni boða til verkfalls, ástæða eru bágar aðstæður, lág laun, skortur á verkefnum/vinnu og úrræðum. t.d. heilbrigðisþjónustu og félagslegri aðstoð.“
DV bar málið undir Guðmund Inga Þóroddsson, formann Afstöðu, félags fanga. Segir hann að félagið standi ekki að aðgerðunum. Afstaða hefur átt fundi með dómsmálaráðuneytinu í því skyni að fá fæðispeninga fanga hækkaða og hefur orðið nokkuð ágeng. Í tilkynningu frá félaginu segir að fæðisfé hafi verið hækkað afturvirkt um 100 krónur á dag frá 1. september. Afstaða vonast til þess að sá hópur fanga sem lagði niður störf í dag hefji störf aftur sem fyrst. Tilkynningin er eftirfarandi:
„Afstaða, félag fanga og annarra áhugamanna um bætt fangelsismál og betrun, stendur ekki að aðgerðum takmarkaðs hóps fanga á Litla-Hrauni sem lagt hefur niður störf til að mótmæla upphæð fæðisfjár og því að dagpeningar og þóknun fyrir vinnu í fangelsum hefur ekki verið hækkuð í tæpa tvo áratugi. Umrædd hækkun hefur verið baráttumál Afstöðu um langt árabil og hefur stjórn félagsins því fullan skilning á aðgerðunum á Litla-Hrauni sem varða stórt réttlætismál innan fangelsiskerfisins.
Afstaða hefur átt reglulega fundi í dómsmálaráðuneytinu um þessar upphæðir og breytingar á reglugerðum sem snúa að málinu og fengið þau svör að málið sé í vinnslu og að svars megi vænta innan tíðar. Fangelsismálastofnun hefur þegar brugðist við og hækkað fæðisfé afturvirkt frá 1. september um 100 krónur á dag og er því fæðisfé 1.700 krónur á dag á hvern fanga. Afstaða vonar að að ráðuneyti dómsmála taki við sér jafn fljótt og Fangelsismálastofnun enda ljóst að umræddar upphæðir verða að hækka í takt við annað í samfélaginu og í raun þyrfti hækkunin að verða sjálfkrafa og taka mið af ráðstöfunarfé Tryggingastofnunar.
Afstaða vonast til þess að samtal milli allra aðila skili sér á farsælan hátt og að þeir fangar á Litla-Hrauni sem lögðu niður störf í morgun hefji störf aftur í dag eða sem fyrst.“
