Forsætisnefnd borgarstjórnar Reykjavíkur samþykkti á fundi sínum fyrir helgi uppfærslu á reglum um hjónavígslur í Ráðhúsi Reykjavíkur en reglurnar voru fyrst staðfestar 28. apríl síðastliðinn. Uppfærslan snýst einkum um að leyfa hjónavígslur í Ráðhúsinu á laugardögum.
Segir í reglunum að hægt sé að leigja tvo sali á þriðju hæð í norðurhluta Ráðhússins, ásamt rými í Tjarnarsal, fyrir hjónavígslur. Hægt er að leigja salina frá kl. 10:00-15:00 alla daga nema þriðjudaga og sunnudaga.
Leiguverð er 30.000 krónur, án virðisaukaskatts, nema á laugardögum þá er það 40.000 krónur, fyrir utan virðisaukaskattinn.
Athöfnin má taka að hámarki eina klukkustund og ekki geta verið fleiri en 50 gestir viðstaddir.
Segir í reglunum að leyfilegt sé að skála að athöfn lokinni en ekki sé leyfilegt að vera með hrísgrjón, sápukúlur, glitpappír (konfetti) og þess háttar. Segir einnig að hægt sé að leigja glös í Ráðhúsinu, samkvæmt gjaldskrá, sé þess óskað.