Sharon Stone var mjög eftirsótt leikkona og vinsælt kyntákn í Hollywood á tíunda áratugnum. Hún hefur unnið til ótal verðlauna, meðal annars Golden Globe og Emmy verðlauna, en það hefur farið lítið fyrir henni undanfarna tvo áratugi. Hún segir að Hollywood hafi hafnað henni eftir að hún fékk heilablóðfall árið 2001.
Stone opnaði sig um veikindi sín og viðbrögð Hollywood í ræðu fyrir Raising Our Voices. The Hollywood Reporter greinir frá.
„Ég fékk heilablóðfall árið 2001, líkurnar á að ég myndi lifa af voru 1 prósent. Ég var með heilablæðingu í níu daga og það tók mig sjö ár að jafna mig og ég hef ekki fengið vinnu síðan,“ sagði hún.
„Samningurinn minn breyttist, ég get ekki unnið meira en fjórtán tíma á dag. Þegar þetta gerðist fyrst þá vildi ég ekki segja neinum því eins og þið vitið, ef eitthvað er að þér þá ertu ekki lengur með. Eitthvað gerðist fyrir mig og ég er ekki lengur með, ég hef ekki verið með í tuttugu ár.“
„Ég vil segja ykkur að þetta var sárt, það var sárt að fá útborgað. Það var sárt að rífast við yfirmenn framleiðslufyrirtækja. Það var sárt að setja mörk,“ sagði hún.
Stone, 65 ára, skaust upp á stjörnuhimininn á tíunda áratugnum þegar hún lék í vinsælu myndunum Basic Instinct og Casino.