Þetta eru skilaboðin frá fjölda sérfræðinga í málefnum öfgamanna í kjölfar dóms yfir fjórum af leiðtogum öfgahægrihreyfingarinnar Proud Boys. Þeir voru fundnir sekir um að hafa staðið á bak við árásina á þinghúsið í Washington þann 6. janúar 2021.
Málareksturinn krafðist mikils af ákæruvaldinu og mikill pólitískur metnaður var lagður í málið og að fá mennina sakfellda. Merrick Garland, dómsmálaráðherra, sagði eftir dómsuppkvaðninguna að dómurinn markaði tímamót í baráttunni við hópa ofbeldishneigðra öfgahægrimanna en dómurinn er víðs fjarri því að vera ávísun á að búið sé að ráða niðurlögum þessara hópa.
Þetta hefur Jótlandspósturinn eftir Jon Lewis, hjá George Washington University í Washington, sem er einn helsti sérfræðingurinn í málefnum Proud Boys. Hann sagði engan vafa leika á að dómurinn yfir fjórmenningunum sé þungt högg fyrir samtökin en ef kafað sé dýpra ofan í það sem er í gangi sjáist vel að samtökin séu enn mjög virk en starfi núna meira staðbundið.
Enrique Tarrio, leiðtogi samtakanna, hefur sagt Proud Boys vera samtök fyrir „vestrænar karlrembur“. Sérfræðingar segja að samtökin, eins og svo mörg önnur bandarísk samtök öfgamanna, trúi á yfirburði hvítra yfir aðra kynþætti.
Fram að árásinni á þinghúsið snerist starf Proud Boys mjög um Donald Trump og forsetakosningarnar 2020. En nú hafa samtökin beint sjónum sínum annað. Lewis sagði að það sé eðlileg afleiðing þess að leiðtogar samtakanna hafi verið í haldi og þurft að verjast fyrir dómi.
Félagsmenn mættu til dæmis nýlega í mótmæli í Maryland sem beindust gegn dragsýningu. Þar beindu þeir sjónum sínum að LGBTQ-aðgerðasinnum. Umræðan um málefni LGBTQ-fólks er einmitt mjög heit í Bandaríkjunum þessa dagana.
Lewis benti á að samtökin taki oft þátt í staðbundnum pólitískum uppákomum þar sem þau beiti ofbeldi og hótunum gegn þeim hópum sem þeim líki ekki við.
