Örlítið krísuástand ríkir á Akureyri eftir að KA hefur nú tapað þremur leikjum í röð í Bestu deild karla, töpin hafa komið gegn þremur efstu liðum deildarinnar.
KA endaði í öðru sæti Bestu deildarinnar á síðustu leiktíð. Arnar Grétarsson stýrði þá liðinu lengst af tímabilsins.
KA ákvað að bjóða Arnari ekki nýjan samning og var honum svo sagt upp störfum fyrir síðustu leiki tímabilsins, hafði hann samið við Val á þeim tímapunkti.
Hallgrímur Jónasson var ráðinn þjálfari KA en liðið hefur skorað fjórum mörkum minna en í fyrstu níu leikjunum í fyrra og fengið á sig sjö mörkum meira en í fyrra.
Víkingar hafa svo sannarlega bætt sig á milli ára en eftir níu leiki í fyrra var liðið með 16 stig og aðeins þrjú mörk í plús.
Nú eftir níu leiki er Víkingur með fullt hús stiga, 27 stig og er með ellefu stigum meira en á sama tíma í fyrra.
Þá eru Víkingar með 19 mörk í plús, liðið hefur skorað 21 mark en aðeins fengið á sig tvö. Liðið fékk 15 mörk á sig í fyrstu níu umferðunum í fyrra.
Breiðablik er með 21 stig sem er aðeins þremur stigum minna en á sama tíma í fyrra, liðið hefur fengið á sig 11 mörk sem er það sama og í fyrstu níu leikjunum í fyrra.
Blikar höfðu í fyrra skorað 27 mörk í fyrstu níu leikjunum en hafa nú skorað átta mörkum minna. Breiðablik hefur tapað tveimur leikjum og er sex stigum á eftir Víkingi.
Valur byrjaði tímabilið afar sannfærandi en liðið hefur hikstað í síðustu leikjum og situr í þriðja sæti. Undir stjórn Heimis Guðjónssonar í fyrra var liðið með 16 stig en hefur þremur meira núna undir stjórn Arnars Grétarssonar.
Valur hefur tapað stigum í síðustu tveimur leikjum, einu töp Vals í sumar hafa komið gegn Breiðabliki en liðið mætir Víkingi á útivelli í næstu umferð.
